Dormit bi dat schöne Golfvergnögen nix in Weg staht, hebbt wie een Immentuun mit Affslutkassens boot. Dorför bruukt ji een 1 Euro Stück as Pand, ans sünd de Kassens natürlich ümsüns. Alerdings köönt wi dor keen Haftung för joun Wertsaaken övernehmen ober dat is ja öberall so begäng.
Ji finnt us in Snevern in Walter-Peters-Park in de Verdener Str. 38. Parken könnt ji op den öffentlichen Parkplatz direkt blangen den Walter-Peters Park oder gegenöver up den Parkplatz vun de Freetiedbegegnungsstätte. Beide Parkplätze kösst nix. Use Anloog liggt denn ca. 250m in Park, direkt gegenöver vun den groden Aventüürspeelplatz.
Ji drööft joun eegen Drinken un Eten mitbringen und bi us up de Kaffeeterrass verteern. Jüst bi Kinnergeburtsdoog ward dat geern mokt – dat Geburtsdagskind schall jo ok sein leefsten Koken eten künn. An Kiosk hebbt wi för jou ok noch een groodet Angebot an Drinken, Iis,Kaffee und Koken und ok nich to düer.
De Weeg bin Schnucken-Golf sünd ohne Stufen. Dor is öberhaupt keen Probleem mit Kinnerwogen, Rullator oder Rullstohl mit de Speellüd mittogohn. Ünnerwegens sünd veele Sittsaken toon verpusten. Mit Rullator oder Rullstohl künn man ok speelen , man mutt speelbedingt ober ok mol op de Bohnen gohn und dor ward dat mit den Affsatz denn een beten schwoor.
Mit een Fohrrad könnt ji direkt bit för de Dör fohrn. Wie hebbt veele Fohrradstänners, dormit ok E-Bikes goot sichert parkt weern könnt in de Tied wo ji den Golfsläger schwingt.
Na kloor könnt ji bi us ok Goodschiens kriegen. Den Bedrag könnt ji sülms bestimm. Wi könnt jou de Goodschiens ok schicken, dor reckt een Anroop oder ji schickt us eene Mail . De Goodschiens verfallt nich, gillt also in de nächste Saison ok noch woller.
Jümmers woller is dat mitbringen vun Hunn Thema. De loot man beter to Hus. In Kino oder Supermarkt nimmt man jüm jo meist ok nich mit. Wi verstoht ober natürlich, dat de Besöök bi us oft een Familienutflug is un dor gehört för veele de Hunn eenfach dorto. Wenn dat gor nich anners gaht könnt ji den Hund mitbringen.In Walter-Peters-Park und ok op use Anloog mut de Hund an ne Lien lopen und zwor an eene korte. Hunn dröft ok nich op de Bohn pedden. Bitte dinkt dorandat dat wi ok veele liddere Kinner op de Anloog hebbt, de den Ümgang mit Hunn viellicht nich kennt und dat dat ok mol een beten lurder togoon kann. Tohopen mit dat Frauchen oder dat Herrchen op de Kaffeeterrasse to töben un den Rest vun de eegen Truppe bin Speel totokiekenis is ok ne Möchlichkeit un kann ok schön entspannt röberkomm.
Schnucken-Golf is een tollet Ziel vör een Kinnergeburtsdag! Dor is een Anmellung antoraden. Wie stellt denn een Geburtsdagsdisch paraat, geern nehmt de Gäste de Schaddenplätz ünner de olen Eeken. Dat Geburtsdagskind het natüürlich freen Intritt, all Kinner kriegt ok een Wunnertüt mit Södigkeiten. Bi de Anmellung könnt ji ok besünnere Wünsche beschnacken, z.B. een besünnern Koken oder viellicht ok ganz wat anners. För de Inlodung to joun Fier könnt ji jou bi us schicke Schnucken-Golf- Inladungskoorten afholen oder de PDF-Dateien to‘n sülm utdrucken rünnerloden.
Köppeln af 10 Lüd kriegt bi us Rabatt! Schön is dat wenn ji jou vörher anmellt und joun Wünsch mit us affschnackt. De meersten Köppeln möögt bi de Speelrunde oder dornoh noch een beten tosamen sitten un Kaffee drinken oder een Iis eten. Dorto stellt wi jou gern de Dischen tosammen un bereit das een beten schön vör und dat is mit een Anmeldung veel eenfacher vör all.
Ok för Firmfiern, Vereinsutflüüg , Team- Building usw.i is Schnucken-Golf eene tolle Saak. Jeder kennt dat normole Minigolf. De körperlich Bedingen sünd ok nich hoch, ok nich ganz so sportliche Speelers könnt ahn Probleme doran deelnehmen, keen een ward sick utgrenzt föhlen.Um beter plonen und vöbereiten to können bitt wi üm joun Anmellen. Hier könnt wi denn joun Wünsche besnacken ob ji een besünnere Koken oder Drinken oder ok noch annere Wünsche an de Gastronomie hebbt. Ok to Foot kann man vun hier no veele Restaurants in Schnebern gohn. Hier gifft dat för jeden Gesmack dat richtige. Ok för Köppeln-Events stellt wi geern Dischn und wat ton sitten op den Rosen ünner de groden Eeken hen.
Bi us könnt ji ok mit Koort betohlen, alle gängig Varianten werd akzepteert.
Use Mehrfachkoorten richt sik in eerste Linn an use gooden Anängers ut de Gegend rund ümto Schnebern. De 5er Koorten werd up den Speeler utstellt und sind nich to öberdregen. Dat gifft düsse Koorten för Kinne und för Utwossene Lüd.
All Besögers de een Erlebniscard Lüneburger Heide, de Volksbank MeinPlus-Karte, de Ehrenamtskarte Niedersachsen, Studenten und Lüd mit behinnerungen dröft natürlich weniger Intritt betolen. Se nöt de entsprekende Koort an de Kass vörwiesen, dormit de Kassierers bescheet wet und den Pries denn minnern könnt.
Wi leggt groden Wert op Nachhaltigkeit. Enige vun uns Maatnahmen hebbt wi in usen News-Bereich nipp un nau beschreven. Dat könnt ji hier nohlesen.
In de Monat von April bit Oktober hebbt wie jeden Dag vun 10 – 18 Uhr oppen, för Köppelevents no afsprook ok mol länger. Id dat Weer to schlecht mokt wie den Loden ok mol dicht.
Ok in dat Tiedöller vun Whatsapp, Instagram, Facebook usw. freut sik de Frünn oder Familienmitglieder de tohus bleeben sünd, wenn ut den Urlaubsort mol een Postkoort schickt ward. Wi hebbt hier twei verscheeden Biller ob de Koorten för jou paraat, kiekt eenfach mol vörbi.
Dat is een ganz besünneret Anbott för Köppels, Schoolklassen un all Rätselfrünn: us Schnucken-Rally. Wi hebbt passlich to de veelen Themengebiete üm use Boohnen eenen lütten Frogebogen mit eenfache Frogen rund üm use Boohnen mookt. Jüst för Schoolklassen is dat een spoßige Afrundung vun den Besöök bi us. Oftmols ward denn noh de Minigolf-Runn bii`n Imbiss roat. De Frogebögen gifft dat bi den Mitarbeiter in Kiosk för ümsüns.
Natüürlich schall Minigolf in eerste Liin Spoß moken, ober mehr Spoß mokt denn doch soon lüttjer Wettstriet mit de annern Speelers. Üm to kieken wi ji in Vergliek to de annern Speelers speelt hebbt, gifft dat use Schnucken-Scharts. Wenn ji möögt denn könnt ji jou dorup indreegen loten, froogt eenfach woller den Mitarbeiter ut den Kiosk, de weet bescheed.
Am besten dreegt ji flache Schoh. Stöckelschoh un anner hoge Afsäts am besten nich.
Genau gegenöver vun Minigolfplatz befinnt sik de groode Aventüürspeelplatz in Walter-Peters-Park. Hier finnt sik för jedereen dat passige Speelgerät. Wenn sik de Lütten no de Golfrunn noch mol richtig uttoben wüllt, is dat hier de beste Platz dorför. De Öllern könnt denn vun use Kaffeeterrasse ut , bi Kaffee un Koken in ruh tokieken wie de lütten speelt.
De wichtigste Regel bi`n Aventüür-Minigolf is: „ Heb Spoß !“ . Dat gifft also keen streng Regeln un ok keen Schiri. Normoler Wies snackt de Speelers sik af wieveel Schlääg för jede Boohn mokt wer n dröft (meist 7-8) oder wat passeert wenn de Ball vun de Boohn rullt ( meist ward de Ball dor woller op de Boohn leggt wo he rünnerfallt oder man fangt eenfach woller vun föörn an). Jede Köppel kricht an Ingang eene Scorekoort, dor ward denn vör jedereen indroogen wieveel Schlääg he vör jede Boohn nödig hett. An Ennd ward denn de Ergevnisse vun de 18 Boohnen tohopentellt un denn hett de Speeler mit de lüttste Zohl gewunnen.
Wi hebbt dor noch een Hinwies op twe ünnerscheedliche Speeloorten. Bi de klassisch Oort speelt jede Speeler de Boohn vun förn bit achtern one Ünnerbreken bit to Ennd, egol ob he „Hole in One“ schafft oder maximole Schlaggzohl bit toon Innloggen bruukt. Eerst wenn he to Ennd speelt het kummt de nächste Speeler an Afschlag.
Bi de Billard-Oort ward noh jeden Schlagg wesselt, de Bäll blieft op de Boohn lingen un könnt ünner Ümstänn ok mol vun een annern Ball wechschupst weern, eben so wie man dat ok vun Billard kennt.
Jüst neben use Anloog is een öffentlich Klo, ok mit Wickelmöchlichkeit för de ganz Lütten un wo Rullstohlföhrers ok goot in torecht kommen könnt.
Grundsätzlich kann man ok bi regen golfen , ober so richtig Spooß mokt dat denn nich. Bi lütje Regenschuern kann man sick an Kiosk schuulen un eene korte Regenpause moken. Wenn dat Weer bi`n speelen ober so gräsiig ward dat ji gor nich wiederspeelen könnt denn bekoomt ji up joun Wunsch een Gootschien för een freen Besöök bi beteret Weer.
Hier investiert Europa in die ländlichen Gebiete mit der Maßnahme: „LEADER“.
Mit dieser Maßnahme wird die Zusammenarbeit und die Initiierung, Organisation und Umsetzung von Projekten zur nachhaltigen Entwicklung in ländlichen Gebieten („LEADER-Region“) unterstützt.
